阿仙奴重奪英超近在咫尺！「兵工廠」周二(19日)凌晨憑夏維斯一箭定江山，主場1比0險勝般尼，依家領先踢少1場嘅曼城5分，如果曼城周三(20日)凌晨作客般尼茅夫贏唔到，阿仙奴就可以提早封王。即使曼城贏波，阿仙奴只要喺煞科戰擊敗水晶宮，亦可以自2004年後再捧英超冠軍。

阿仙奴一開波就控制戰局，不斷製造攻勢，李安度杜沙特曾遠射中柱，布卡約沙卡亦有半射半傳中楣彈出；34分鐘沙卡禁區內疑被踢跌，但球證並冇表示，不過3分鐘後阿仙奴就憑招牌角球攻勢，由夏維斯接應沙卡嘅傳送頂入，沙卡亦成為阿仙奴史上第5個交出50次英超助攻球員。

換邊後阿仙奴繼續進攻，但遲遲未能拉開紀錄，中段開始踢得緊張，夏維斯曾有飛鏟踢中人，VAR一度檢查係咪升級紅牌，幸最後維持黃牌判決。阿仙奴之後有約基利斯搶走般尼門將腳下球後被踢跌，球證同樣覺得冇事，最終阿仙奴順利保住勝局。

阿仙奴22年嘅英超冠軍等待，最快周三凌晨結束，領隊阿迪達賽後被問到會唔會睇曼城比賽，佢就回應：「我會睇，但唔知睇幾耐。我哋冇安排職球員一齊觀戰，我諗住同家人一齊睇。」般尼茅夫主帥伊拉奧拿係阿迪達多年朋友，阿迪達笑稱：「我會係佢哋最忠實嘅粉絲！」

最強博彩盤路過關神器《串績王》：http://win.on.cc/football/